ALLE ORANIËRS WORD GENOOI NA DIE LENTE REGRUK OP 11 SEPTEMBER

121/2026

8 September 2026

Geagte Oraniërs,

ALLE ORANIËRS WORD GENOOI NA DIE LENTE REGRUK OP 11 SEPTEMBER

Opsomming : Die Lente Regruk sou aanvanklik op 4 September plaasvind, maar is as gevolg van gure weersomstandighede tydelik uitgestel. Hiermee kondig ons amptelik aan dat dit nou eerskomende Vrydag, 11 September, gaan gebeur. Daar word hierdie jaar ook koffie en koekies voor die tyd bedien en verversings en koeldrank na die tyd.

In Kennisgewing 110/2026 het ons die Lente Regruk as volg aangekondig (die datums hieronder is wel aangepas om korrek te wees):

Die lente is die ideale tyd om ons eie omgewing op te knap, te verfris en te vernuwe.

Dit het die gebruik geword dat die Orania Dorpsraad jaarliks die leiding neem met die Lente Regruk, waarvan die sigbaarste gedeelte die rommelverwydering vanaf openbare terreine is, wat ons elke eerste Vrydag van September aanpak. Ons is baie dankbaar vir ander instansies, sowel as lede van die gemeenskap en privaat besighede, wat oor die afgelope paar jaar ook by hierdie poging betrokke geraak het en sodoende ons hand versterk.

Die Orania Dorpsraad en die Orania Bewaringstigting nooi hiermee alle belangstellendes, beide individue sowel as instansies, om by ons aan te sluit op Vrydag 11 September om 07:30 op die grasperk voor die Dorpskantoor. Ons gaan lekker saam koffie en koekies nuttig waarna ons beplan om saam te open, die reëlings met almal te bespreek en dan in groepe te verdeel om toe te sien dat ons die hele dorp effektief kan bereik. Elke groep kan verdaag sodra hulle klaar hul roete voltooi het, maar ons nooi graag almal wat hieraan deelneem om teen 11 uur by Rooipoort parkie bymekaar te kom vir lekker verversing en ‘n koue lafenis.

Belangstellendes kan gerus vir Karlien de Beer by 053 207 0063 of karlien@myorania.co.za kontak vir verdere inligting.

Onthou asseblief ‘n hoed, geskikte skoene en ‘n bottel water. Ons sal swart plastieksakke voorsien.

Orania groete,

Arno Lambrechts
Hoof: Gemeenskapsdienste

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/