GESUIWERDE WATER SAL TYDELIK EFFENS TROEBEL VOORKOM

063/2025

2 April 2025

Geagte Aandeelhouers en Inwoners,

GESUIWERDE WATER SAL TYDELIK EFFENS TROEBEL VOORKOM

Opsomming : Gesuiwerde water mag vir ‘n rukkie effens troebel voorkom, maar is steeds heeltemal veilig om te drink.

Neem asseblief kennis van die volgende punte rakende Orania se gesuiwerde water:

1. As gevolg van die goeie reënval in ons omgewing die afgelope tyd, is die Oranjerivier se water modderiger as normaal, wat veroorsaak dat ons gesuiwerde water ook tydelik effens troebel is.

2. Die waterkwaliteit van die rivier fluktueer redelik baie na gelang van die intensiteit van die reënval (omdat stormwaterafloop na die rivier gedurende swaar reënperiodes toeneem). Ons suiweringstelsel moet voortdurend daarby aanpas, wat klein verskille in die finale produk kan veroorsaak.

3. Weerlig tydens ‘n onlangse donderstorm het die outomatisering van die watersuiweringsaanleg beskadig, maar ons personeel monitor die stelsel deurlopend om seker te maak dit funksioneer steeds volgens ons hoë standaarde.

4. Periodieke laboratoriumtoetse van die rivierwater vind steeds plaas soos normaalweg, om te verseker dat geen gevaarlike besoedeling teenwoordig is nie.

5. Die gewone daaglikse toetse op die gesuiwerde water word ononderbroke voortgesit om te verseker dat dit veilig en drinkbaar bly.

Inwoners kan dus gerus voortgaan om die gesuiwerde water soos altyd te gebruik, selfs al lyk dit af en toe effens troebel.

Vriendelike Groete ,

Andre van Heerden

Hoof: Ingenieursdienste

U kan, soos altyd, die Dorpsraad oor enige onderwerp kontak deur die volgende skakel te volg : $ https://myorania.co.za/kontak-ons/$ 

Indien u dit anoniem wil doen, kan u die Anonieme Forum op die myorania.co.za webwerf gebruik, deur die volgende skakel te volg – $ https://myorania.co.za/anonieme-voorstelle-opmerkings-of-klagtes/$