Uitvoerende Hoof
Uitvoerende hoof
ons bou die stad!
Die uitvoerende hoof van Orania Dorpsraad staan in die volksmond bekend as die dorpsbestuurder.
Die kantoor van die dorpsbestuurder is waar die strategiese besluite wat geneem word om uitvoering aan Orania se Godgegewe roeping te gee, met die kundige insette en voorstelle van die onderskeie afdelingshoofde in prakties uitvoerbare beplanning omskep word.Â
Die dorpsbestuurder is ‘n belangrike skakel tussen:
- die verkose direksie van Orania Aandeleblok (Dorpsraad) en die administrasie (dorpskantoor), asook
- die dorpskantoor en die gemeenskap van die Orania-dorpsgebied.
Dit is belangrik dat die kantoor van die dorpsbestuurder, net soos al die afdelingshoofde van die Dorpsraad, baie toeganklik moet wees aangesien dit inwoners in staat stel om kwessies en sake waaroor hulle besorg is, direk met hom/haar/hulle op te neem. Alhoewel dit nie moontlik is om aan alle verwagtinge te voldoen nie, is dit belangrik om die gemeenskap se verwagtinge, wense en frustrasies goed te verstaan. Sodanige voorkennis stel die dorpskantoor in staat om verwagtinge te bestuur in geval van onredelikheid, of om die nodige operasionele aanpassings te maak sodat daar aan redelike verwagtinge voldoen kan word. Goeie en effektiewe kommunikasie met die gemeenskap is derhalwe van kardinale belang.
Gawie Snyman
Departementshoof
Uitvoerende hoof
Verantwoordelikhede:
– Skakel met Raad en Raadsvergaderings
– Strategiese beplanning & bestuur
РBeleidsformulering en statut̻re ontwikkeling
– Menslike hulpbronne- en prestasiebestuur
– Publieke verhoudinge/skakeling en kliëntediens
Verantwoordelikhede van die Dorpsbestuurder
Die dorpsbestuurder se verantwoordelikhede sluit onder meer die volgende in:
- Ondersteuning aan die verkose direksie in soverre dit die bepaling en formulering van strategiese doelwitte betref.
- Jaarlikse verslagdoening aan die aandeelhouers van Orania Aandeleblok.
- Ontwikkeling en daarstelling van strukture, prosesse en/of meganismes om uitvoering te gee aan dorpsreëls, direksiebesluite en aandeelhouersbesluite.
- Bevordering van deelnemende regering deur die ontwikkeling van kommunikasiestelsels en openbare deelnameprosesse, sodat inwoners insette kan lewer met betrekking tot kwessies wat hulle raak.
- Daarstelling, ontwikkeling en verfyning van strategiese bestuurstelsels vir Orania Aandeleblok ten einde strategiese, ontwikkelings- en diensleweringsdoelwitte te bereik.
- Effektiewe aanwending van finansiële en menslike hulpbronne.
- Toesighouding oor die implementering en effektiewe uitvoering van Orania se geïntegreerde ontwikkelingsplan.
- Daarstelling en ontwikkeling van ‘n ekonomies effektiewe en verantwoordbare administrasie om te verseker dat goeie korporatiewe bestuursbeginsels deurgans gehandhaaf word.
- Ontwikkeling van strategiese bestuurstelsels om te verseker dat die onderskeie afdelings die verwagte uitkomste wat aan hulle gestel word, bereik.
- Verskaffing van beide leiding en ondersteuning aan afdelingshoofde met betrekking tot die formulering en prioritisering van uitkomste en ontwikkelingsdoelwitte.
- Dien ex officio as direkteur van Orania Veiligheidsdienste (OVD), bestuurslid van die Orania Weerbaarheidsvereniging (OWV) asook hoof van Orania se Gesamentlike Operasionele Sentrum (GOS) wat omsien na algehele veiligheid (intern en ekstern) in die groter Orania-grondgebied.
- Publieke verhoudinge en skakeling deur onder meer:
- toe te sien dat gereelde terugvoervergaderings met die gemeenskap gehou word oor aktuele kwessies en werksaamhede van die dorpskantoor;
- toe te sien dat kwartaallikse gesprekke tussen die direksie en die gemeenskap gefasiliteer word;
- effektiewe kommunikasie met die gemeenskap by wyse van kennisgewings, sosiale media, meningspeilings en gebruikmaking van verskeie ander platforms.
