OPDATERING – LANDSWYE PROTESAKSIE IN SUID-AFRIKA VANDAG (30 JUNIE 2026)

083/2026

30 Junie 2026

Geagte Oraniërs,

OPDATERING – LANDSWYE PROTESAKSIE IN SUID-AFRIKA VANDAG (30 JUNIE 2026)

Opsomming : Ons wil graag aan inwoners bevestig dat die situasie rondom vandag se beplande wydverspreide betogings in Suid-Afrika deurgaans gemonitor word, en dat daar tans geen gevaar in Orania of in enige van ons buurdorpe is nie.

Soos laas week in kennisgewing 087/2026 gekommunikeer is, is daar geen verwagting van direkte gevaar vir Orania tydens vandag se landswye betogings teen onwettige uitlanders nie. Op hierdie stadium lyk dit dus asof ons risiko-analise korrek was en dat daar niks is waaroor inwoners hulle hoef te bekommer nie.

Vanuit ons eie gemeenskap en beheerkamer weet ons dat geen insidente in of naby Orania voorkom nie. Ons het ook met die SAPS-stasiebevelvoerders van dorpe soos Vanderkloof, Petrusville en Hopetown opgevolg, en ook daar is niks noemenswaardigs aan die gang nie. Die naaste optogte waarvan ons bewus is, is in Kimberley, maar ook daar gaan dit blykbaar nog met geen geweld gepaard nie.

Ons is baie dankbaar vir die situasie en ook vir die gemoedsrus wat die Orania Weerbaarheidsvereniging (OWV) se goeie voorbereiding vir verskeie moontlike gebeurlikhede bied.

Indien daar inwoners is wat ook deel wil word van die groot hoeveelheid Oraniërs wat vrywillige lede van die OWV is en hulle deel wil bydra om ons gemeenskap veilig te hou, is hulle welkom om OVD te kontak by 053 207 0089 of 060 501 7877. Alle vrywilligers hoef nie noodwendig fikse jong manne te wees nie, en daar is vele aktiewe lede van die OWV, van beide geslagte en van ouer generasies, wat hulle deel doen sonder die noodsaaklikheid om aan enige ekstreme fisiese aktiwiteite deel te neem.

Orania groete,

Gesamentlike Operasionele Sentrum (GOS)

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/