Beeldekoppie

Op hierdie koppie is ‘n versameling borsbeelde van voormalige Afrikaner staatshoofde, wat almal eers elders uitgestal was, maar toe uiteindelik in Orania ‘n veilige heenkome gevind het, tesame met ‘n beeldjie van die Klein Reus (Orania se simbool, wat ook op ons vlag pryk).

Die Klein Reus beeld simbolies uit hoe Oraniërs die leuse, Labore Ad Libertatum (deur Arbeid tot Vryheid), uitleef. Ons mag dalk nog jonk wees (hy is ‘n seun), maar ons neem beheer van ons eie toekoms en vryheid (hy rol sy moue op om te werk), met krag (hy het sterk arms en ‘n groot vuis) maar in nederigheid (sy vuis is na onder – in teenstelling met ander beroemde simbole in die wêreld met ‘n vuis na bo) en in afhanklikheid van ons God (hy doen dit met ‘n geboë hoof). Sy postuur en gesindheid maak hom voorwaar ‘n reus om mee rekening te hou!

Die inskripsie op die plaat lees:

“Volkseie arbeid is die voorvereiste vir volhoubare vryheid in ‘n eie grondgebied. Volksgenote moet verantwoordelikheid neem vir alle soorte werk, soos dit die geval oor die wêreld heen is. Hierdie uitdagingspunt is so grondliggend dat dit die waarborg skep vir alle ander vryheidsvoorwaardes. Geen grondgebied vir Afrikaners kan tot vryheid groei terwyl dit van nie-Afrikanerarbeid afhanklik is nie.

Wanneer arbeidskrisisse ontstaan in die toepassing van die beginsels van volkseie arbeid, sal mede-Afrikaners mekaar bystaan om sulke krisisse te oorkom en onder geen omstandighede terugval op die vryheidsvernietegende praktyke van vreemde arbeid nie.

LIBERTAS: Burgerlike Vryheid, Onafhanklikheid, Geestelike Vryheid”

.