Die aanplant en verbouing van sekere kultivars “hemp” waarvan die THC-inhoud sodanig laag is dat dit nie vatbaar of bruikbaar vir dwelm-verwante aktiwiteite is nie, behoort nie ’n probleem te wees nie. Dit is egter nie ’n “grootskaalse industrie” wat vir die Dorpsraad kan ontstaan nie, maar moontlik iets vir die privaat sektor. Indien daar wel vanuit die privaat sektor ’n behoefte daaraan is, sal dit wel nodig wees om vooraf sodanige behoefte en kultivar met die Grondgebruikbestuurskomitee (GGBK) te bevestig. Daar is nie binne OAB-gebied noodwendig genoeg landbougrond vir sodanige “grootskaalse industrie” nie, so dit mag moontlik ook ’n vraagstuk vir ’n ander grondentiteit wees.

Nietemin, by die toepassing van die reëls rakende dwelms sal dit nie op vervolging kan uitloop waar vooraf bevestiging van die kultivar met baie lae THC-inhoud met die GGBK opgeneem is nie, met dien verstande dat by die oogmerk van verbouing gehou word. Voorafgaande soos gestel neem egter nie die diskresie van die GGBK weg, soos wat die GGBK steeds ten aansien van enige besigheidsregistrasie het nie.