NUWE WEBWERF VIR ORANIA REGSPLEGING

105/2026

24 Augustus 2026

Geagte Oraniërs,

NUWE WEBWERF VIR ORANIA REGSPLEGING

Opsomming : Orania Regspleging se nuwe webwerf is beskikbaar by https://regspleging.co.za/. Inwoners kan hier meer inligting oor Orania Regspleging, sy werksaamhede, begronding en dienste bekom. ’n Afsonderlike inwonersportaal word tans finaal afgerond en behoort binnekort beskikbaar te wees.

Orania Regspleging is ’n unieke en besondere instelling van Orania wat in diens van geregtigheid ’n bydrae tot die gemeenskap lewer en ’n voordeel bied wat inwoners van min ander dorpe in Suid-Afrika op dieselfde vlak geniet.

Orania Regspleging het saam met Orania organies gegroei en is vandag steeds ’n groeiende instelling. Dit bestaan uit ’n Kantoor vir Regspleging wat vir die operasionele bestuur verantwoordelik is; ’n Regspaneel wat onafhanklik van die kantoor verkies word en ook onafhanklik funksioneer; en die Orania Regsraad wat ’n oorsigtelike en beleidmakende rol vervul.

In ’n groeiende gemeenskap moet hulpbronne verantwoordelik bestuur word en daarom word ’n proses van organiese en volhoubare groei van ons instellings gevolg. Dienste wat deur Orania Regspleging gelewer word, sluit onder meer die belangrike werk in om goeie orde te handhaaf – wat ook ’n voorwaarde vir beleggersvertroue is – asook die fasilitering van mediasies in geskille tussen inwoners.

Gedurende 2026, tot aan die einde van Julie, is reeds 93 dissiplinêre klagtes gehanteer en 42 mediasies afgehandel. Ons is veral daarmee beïndruk dat 96,7% van ons mediasies suksesvol afgehandel is, wat beteken dat die betrokke partye ’n skikking bereik het. Die uitsonderlike diens wat die Regspaneel hierin lewer, moet met dank beklemtoon word.

As deel van die voortdurende uitbreiding van Orania Regspleging se dienste is ’n webwerf ontwikkel waar inwoners relevante inligting en dokumente wat met Orania Regspleging verband hou, kan vind.

Ons is ook besig met die finale afronding van ’n portaal waartoe slegs inwoners toegang sal hê en waarop inligting oor onder meer dissiplinêre verhore en gevalle waar verblyfreg opgehef is, geplaas sal word. Hierdie portaal behoort binnekort beskikbaar te wees.

Inwoners is welkom om https://regspleging.co.za/ te besoek en daar meer oor ons werksaamhede, begronding, vooruitsigte en ander relevante sake te lees.

Die doel is dat hierdie webwerf toenemend tot ’n gerieflike dienspunt sal ontwikkel en Orania Regspleging nóg meer toeganklik vir inwoners sal maak.

Vriendelike groete,

Jan van Zyl
Hoof – Regspleging

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/