Dankie vir jou opmerking en vir die feit dat jy ook graag wil sien dat die nuwe oppervlak van die Servituutpad nie onnodig beskadig word nie.

Let egter asseblief op die volgende:

1. Die doel van die kennisgewing was om te sorg dat so min as moontlik los klippe op die teer beland, waar dit skade aan die padoppervlak kan aanrig wanneer voertuie daaroor ry.
2. Aangesien daar wel grondpaaie is wat by die Servituutpad aansluit, was dit nooit die verwagting dat ons die probleem heeltemal sou uitskakel nie, maar bloot dat ons dit sover moontlik sou beperk.
3. As motoriste dus slegs op die korrekte plekke vanaf die grondpaaie op die teerpad ry, sal daar aansienlik minder klippe op die teer beland as wanneer mense dit op verskeie ander plekke ook doen, selfs waar daar nie paaie is nie. Dit is boonop ook baie veiliger.
4. Die grondpad wat vanaf die Servituutpad na BKO en CVO loop, behoort nie aan die Dorpsraad nie. Ons wens BKO en CVO dus alle sterkte toe met hul pogings om die nodige fondse te bekom om ook hierdie pad uiteindelik te teer. Ons is deeglik bewus van die enorme koste wat daarmee gepaard gaan en verstaan dat dit tot dusver eenvoudig nie moontlik was om die paar miljoen Ora wat daarvoor benodig word, bymekaar te kry nie. Ons vertrou egter dat dit, met die Here se seën, ook mettertyd moontlik sal word.