Eiendomme in Orania word verhandel in 'n vrye-mark stelsel, so enige veranderinge daarin word gewoonweg deur ekonomiese faktore bepaal.

As daar dus gevoel word dat pryse te duur is en dat baie mense dit nie kan bekostig nie, sal dit op die langtermyn seker beste opgelos word deur die versterking van Orania se ekonomie en die verhoging van die gemiddelde Oraniër se finansiële vermoëns (die vestiging van 'n groter en sterker middelklas).

Maar in lig van die inligting hierbo, nl dat normale vraag en aanbod ons pryse bepaal, is dit eintlik tot 'n mate onafwendbaar dat Orania se huispryse hoër is as in ander dorpe van soortgelyke grootte. Ons is 'n Christelike Boere-Afrikaner dorp met 'n baie bekwame munisipaliteit, met uitstekende skole en opleiding, met besondere veiligheid en met 'n gemeenskap wat vry is om hul kultuur uit te leef op vele verskillende maniere! Dus, die vraag vir dit wat ons bied is baie hoër as vir ander plekke op die platteland, en daarom is ons eiendomme vanself ook meer werd.