Onthou asseblief dat die finale sensusgetalle nog nie beskikbaar is nie, en dit sal dus goed wees om eers vir die finale syfers te wag voordat ’n mens te veel hieroor begin spekuleer. Dit is egter waar dat OAB se getalle blykbaar in 2025 ’n klein bietjie afgeneem het, so die totaal vir die hele Orania sal dus moontlik ook effens laer wees.

Hierdie situasie is nie uniek nie, aangesien daar in die eerste twee dekades van Orania se bestaan ook jare was waarin die bevolking afgeneem het, en sedertdien ook jare waarin die groei heelwat laer was as die langtermyngemiddeld van ongeveer 10%. ’n Mens kan dus sien dat Orania se inwonertal oor tyd van ’n sikliese aard is, en dat tye met minder (of selfs negatiewe) groei altyd weer opgevolg word deur tye van beter groei. Daar is geen rede om te dink dat ons huidige swak (of negatiewe) groei nie weer binnekort in gesonde, positiewe groei sal verander nie.

Met dit alles gesê, stem ons egter saam dat ons beter sou gevoel het oor groei in 2025 as oor ’n effense krimping in die inwonertal. Dit is dus iets wat ons deeglik dophou om te bepaal watter effek ons deurlopende beplanning en strategieë, en die implementering daarvan, het.