Dis duidelik dat jy as buitestaander nie juis positief oor Orania is nie (wat natuurlik jou goeie reg is), en dat die doel van hierdie opmerking hoofsaaklik is om ons gemeenskap in ’n negatiewe lig te stel. Daarom sou dit eintlik maklik wees om die opmerking eenvoudig te ignoreer, maar ons wys tog graag hoe swak die gevolgtrekking is wat jy gemaak het.

Jy beweer dat hierdie forum bewys dat die gemiddelde Oraniër ’n “suurpruim” is, maar die feite ondersteun eenvoudig nie daardie gevolgtrekking nie. Oor die laaste 16 maande is daar gemiddeld omtrent twee opmerkings per week op hierdie forum geplaas. Heelwat van die opmerkings is deur dieselfde Oraniërs gemaak, en heelwat is ook duidelik deur mense van buite geplaas (soos jy). Dit beteken dat daar waarskynlik minder as omtrent 1,5 opmerkings per week vanaf ons eie mense kom. Verder is baie van daardie opmerkings neutraal of positief, wat beteken dat die werklike klagtes waarskynlik nie eens meer as een per week is nie.

As mens in ag neem dat ons ongeveer 2 200 volwasse inwoners het, beteken dit dat slegs omtrent 0,045% van ons inwoners in ’n gegewe week ’n klagte hier plaas. Dit is reeds voldoende om te wys hoe oordrewe dit is om op grond hiervan die hele gemeenskap as “suur” of voortdurend ontevrede te probeer beskryf.

Mens kan ook in gedagte hou dat ons, as “owerheid” wat opreg moeite doen om na ons mense te luister, dit verwelkom wanneer inwoners hul griewe lug. Dit gee ons die geleentheid om te verbeter waar nodig, sodat ons dorp as geheel sterker en beter kan funksioneer. Daarmee saam verstaan ons natuurlik dat oop gesprekke en kritiek soms vreemd kan voorkom vir mense soos jy wat blykbaar nie gewoond is aan ’n gemeenskap waar inwoners aktief betrokke is nie.