Dankie vir jou opmerking oor iets wat vir baie van Orania se inwoners soms 'n bron van frustrasie is.

Soos jy noem, is die Dorpsraad reeds in gesprek met Vodacom. Die feit dat die terrein vir die voorgestelde toring aan die Dorpsraad behoort, sowel as die feit dat ons die amptelike publieke deelnameproses van stapel gestuur het, dui daarop dat ons ons volle ondersteuning aan die projek gee sodat ons almal hopelik binnekort beter sein kan ontvang.

Wanneer Vodacom (deur Insite Towers) die voorgestelde toring opgerig het, kan 'n mens verwag dat die ander groot netwerke waarskynlik ook plek daarop sal huur om die nodige tegnologie te installeer wat húlle seine sal verbeter. Alle inwoners, en nie net Vodacom-kliënte nie, behoort dus 'n verbetering te ervaar.

Ons hoop dat die proses (publieke deelname, ens.) glad verloop en dat hierdie projek hopelik binne enkele maande voltooi kan word.

Wat korttermynverbeterings aan sein betref (voordat die toring opgerig word), is die beste voorstel wat ons kan maak dat soveel moontlik Vodacom-gebruikers in Orania self klagtes by die maatskappy indien. Dit kan hulle moontlik aanspoor om intussen 'n mobiele seinversterker aan te bring. Dit is juis sulke persoonlike klagtes wat Vodacom reeds aangespoor het om die nuwe toring voor te stel. Indien daar genoeg druk vanuit die gemeenskap is, kan hulle moontlik so 'n tussentydse oplossing bied.

Kontak gerus die Dorpsraad direk by inligting@myorania.co.za is jy hierdie in meer besonderhede wil bespreek.