Die regering het 'n afvaardiging gestuur met lede vanaf onder andere Thembelihle, Pixley Ka Seme, SALGA, COGHSTA, Omgewingsake, Landmeter Generaal, "Treasury", ens, en die twee gesprekke het breedweg daaroor gegaan dat die verhouding tussen Orania (wat tot dusver, as unieke geval, anders hanteer word as ander "gewone" dorpe) beter gedefinieer en geformaliseer moet word. Orania is natuurlik heeltemal te vinde hiervoor en sien dit as 'n geleentheid om ons selfstandige bestaan en onafhanklikheid verder uit te bou.

Orania se huidige status, wat dinge soos die 2000 Hooggeregshof-bevel, die Oorlegsone van 2010 en ook Artikel 235 van die grondwet insluit, word alles in ag geneem tydens hierdie gesprekke, wat waarskynlik nog lank gaan neem om tot 'n slotsom te kom.

Die OVR het op 10 September 2026 'n publieke vergadering hieroor gehou en volledige terugvoer daaroor aan inwoners gegee. Dit is ook moontlik dat hulle dit binnekort in skrif sal opsom en beskikbaar sal maak aan belangstellendes.

En terloops - ons sien nie regtig enige goeie rede hoekom hierdie gesprek anoniem gevoer moet word nie, want dit is duidelik dat die persoon wat die vrae vra 'n goeie en meelewende inwoner van Orania is (of dan ten minste 'n sterk ondersteuner, indien nie 'n inwoner nie), so ons kan eerder hierdie tipe aangeleenthede oor 'n koppie koffie bespreek! As u dus saamstem dat dit lekker sal wees om in persoon verder te gesels, kontak gerus die Dorpsraad se kommunikasiebestuurder op inligting@myorania.co.za om 'n afspraak vir 'n vriendelike gesprek te maak.