Die teer van die Oewerpad is beslis 'n prioriteit vir die Dorpsraad en sal moontlik reeds in die volgende begroting ingesluit word. Daar was onlangs in-diepte ondersoek gedoen om die teer van veral drie paaie wat tans probleme veroorsaak te oorweeg, naamlik die pad na Kleingeluk, die Servituutpad (Kareeboomrylaan) en die Oewerpad. Daar was onder andere meningspeilings gedoen daaroor, asook verkeerstellings en natuurlik kosteberamings ens. Die ondersoek het aangetoon dat die een wat die grootste impak op die meeste mense het die Servituutpad is (wat terloops ongeveer vyf keer meer vervoer hanteer as die Oewerpad). Daarom is die teer van die Servituutpad ingesluit in die 2025 begroting en gaan dit voor die einde van die jaar opgegradeer word met 'n 8m wye teer ryvlak, in 'n projek van amper R5 miljoen.

Die direksie van OAB sal later in die jaar eers finale besluite neem oor volgende jaar se begroting, maar natuurlik is die teer van die Oewerpad dan een van die belangrike opsies wat oorweeg gaan word.