Baie dankie vir hierdie opregte inset oor die wenslikheid, al dan nie, van beelde in ons Christen-Afrikaner-gemeenskap.

Daar is heelwat Oraniërs wat breedweg hierdie standpunt deel, maar daar is natuurlik ook baie ander Oraniërs (‘n meerderheid) wat met ewe veel opregtheid (en ook met Bybelse motivering) glo dat die blote teenwoordigheid van beelde geen probleem is nie, solank daar geen aanbidding daarvan plaasvind nie.

Die eerste groep voel dat die Kruger-standbeeld, wat eersdaags in Orania opgerig gaan word, neerkom op verafgoding van die persoon, terwyl die tweede groep voel dat President Kruger net ’n simbool van ons volk se strewe na vryheid is en dat geen aanbidding van hom plaasvind nie.

Ons weet dat beide groepe die bona fides van die ander sal erken, en dat die feit dat almal saamstem dat die Drie-Enige God die lot van ons volk bepaal en dat Jesus Christus ons elkeen se persoonlike Verlosser is, sal verseker dat ons as verenigde gemeenskap ons gesamentlike doelwit van vryheid tot God se eer sal aanhou nastreef, ten spyte van die interne meningsverskil oor hierdie spesifieke punt.