Dit is natuurlik waar dat owerhede altyd bedag moet wees op die onbehoorlike invloed wat besighede of belangegroepe op hulle probeer uitoefen, maar Orania se strukture is alreeds tot ’n groot mate verskans teen daardie gevaar (en voortdurende geleidelike verbeterings aan ons strukture moet aanhou om dit te doen).

Wanneer nuwe beleggers in Orania betrokke raak kry hulle nie sommer net meer sê in ons strukture as wat enige ander persoon het nie. Die OVR word verkies deur ‘n “een man een stem” metode waaraan alle inwoners kan deelneem en die direksies van die onderskeie grondentiteite word verkies volgens regverdige metodes wat lankal reeds gevestig is. OAB se direksie word bv verkies deur alle aandeelhouers en die feit dat die onlangste tussen-verkiesing juis nuwe direkteure met nuwe idees aangewys het, is ’n teken daarvan dat die stelsel werk en dat beleggers en ekonomiese groei nie ons gesonde ontwikkeling in die rigting van ons uiteindelike vryheid negatief beïnvloed nie.