Dankie vir jou ooglopende passievolle ondersteuning van die ideaal dat daar grondgebiede moet wees waarin ons mense weer 'n vrye volk kan wees wat oor ons eie belange kan "regeer"!

Orania is natuurlik 'n plek wat reeds beduidende praktiese stappe geneem het oppad soontoe. Die feit dat ons eie munisipaliteit wettiglik erken word en dat ons 'n amptelike oorlegsone het waarin ons besluite oor ons eie grondgebruik kan neem, gee ons reeds 'n redelike groot mate van plaaslike selfregering.

Dit is juis die afwesigheid van munisipale-status en 'n oorlegsone wat ongelukkig die moontlikheid van 'n plek soos Middelpos om 'n volgende Orania te word baie onwaarskynlik (of minstens baie moeilik) maak. Middelpos is deel van ander munisipaliteite se grond, waaraan hulle belasting moet betaal en waar hulle goed soos enige nuwe geboue en ontwikkeling moet laat goedkeur ens (dinge wat in Orania alles in ons eie beheer is).

Dit is dus nie dadelik duidelik of Middelpos juis 'n vatbare opsie is om meer as net 'n Afrikaner-"estate" te skep nie, terwyl Orania alreeds verby daardie punt gegroei het tot waar ons begin om 'n hele streek-effek te hê.

Indien Afrikaners op die einde wel Middelpos koop en 'n soortgelyke gemeenskap as Orania daar begin vestig, sal ons natuurlik in groot vriendskap met hulle kan staan en sal ons saam bid daarvoor dat die Here ook vir hulle op wonderbaarlike wyse groter en groter amptelike vryheid sal bewerkstellig, soos wat die geval was in Orania se ontwikkeling tot waar ons vandag is.