Duidelik aangetoonde huisnommers

voorstelle

Duidelik aangetoonde huisnommers

Vir wie dit mag aangaan,

Orania het reeds pragtige gemerkte straatname, maar myns insiens is dit nie voltooid voordat die huise in so n straat ook duidelike nommers het nie.

Vele huise in Orania het nie so iets nie en indien wel is dit nie van die pad af duidelik sigbaar nie. Ek vind dat so iets belangrik is omdat dit andersins n onmoontlike taak word om iemand op te spoor. Bv. Indien daar met n noodgeval dringend n ambulans ontbied word sal dit baie moeilik wees vir die ambulans personeel om so iemand op te spoor.

Die voorstel is dus om mense te vra om self vir hul huisnommers te laat maak. Mense doen sulke dinge altyd makliker as dit vir hulle maklik is. En daarom sou dit miskien n goeie idee wees om reeds n verskaffer met n nommer en n prys te koppel aan so n boodskap. Dalk moet mens dit as n vereiste te stel by die bou van nuwe geboue, om n groter probleem vir die toekoms te vermy.

Groetnis van nog n Oraniër

Terugvoering

Dankie vir die goeie voorstel, waarmee ons heeltemal saamstem.

Die afwesigheid van nommers by huise is reeds lankal as 'n punt geïdentifiseer wat verbeter kan word. Die feit dat alle aandeelbloknommers nie altyd in logiese volgorde mekaar opvolg nie (as gevolg van onderverdelings, wat dan nuwe nommers reg langs ou nommers veroorsaak), bemoeilik hierdie proses.

Daar is dus reeds 'n projek begin wat straatnommers aan aandeleblokke toeken, maar dit gaan natuurlik gepaard met heelwat beplanning en administrasie en registrasies op sekere stelsels ens, so dit is nie iets wat baie vinnig gedoen kon word nie. Gelukkig staan daardie proses nou na die einde se kant toe, so die vooruitsig is dat dit voor die einde van 2025 geïmplimenteer gaan word.