Orania doen moeite om herwinning so goed as moontlik te doen in die konteks van wat fisies en ekonomies haalbaar is.

Sekere soorte plastiek word bv apart uitgesorteer en gebaal (in ons groot hidroliese pars) en dan in groot-maat verkoop aan Suid Afrikaanse maatskappye wat dit van tyd-tot-tyd kom oplaai met 'n groot vragmotor. Hierdeur maak ons 'n noemenswaardige inkomste wat 'n gedeelte van die onderhoudskoste van die stortingsterrein dek, maar ook verleng ons die leeftyd van die terrein beduidend, omdat die fisiese volume wat plastiekbottels opneem groot is en die terrein baie vinniger sou vol wees as die bottels nie verwyder was nie.

Wat glas betref, word dit apart gehou tydens vullisverwydering sodat dit herwin kan word deur dit fyn te maak en as deel van nuwe padoppervlaktes te gebruik — ’n algemene praktyk wêreldwyd. Die opsie om gebruikte glas te smelt en weer vir nuwe glasprodukte te gebruik, maak tans nog nie sin vir Orania nie. Dit is hoofsaaklik omdat ons volumes relatief klein is en ook omdat ons ver geleë is van groot glasherwinningsaanlegte, wat beteken dat vervoerkoste baie hoog sou wees.

Daar is egter wel ’n moontlike toekomstige geleentheid vir ’n Oraniër om herwinningsaanlegte vir verskillende materiale in Orania op die been te bring. Dit is beslis iets wat ons entrepreneurs gerus kan oorweeg.