Dankie vir hierdie vraag/opmerking.

Die werknemers by die Dorpsraad is baie bewus daarvan dat inwoners van Orania besorgd is daaroor dat die mediese dienste in die dorp op die beste moontlike vlak moet wees, want ons is natuurlik ook self Oraniërs en het dieselfde gesondheids-behoeftes as alle ander inwoners!

Voor ons hieronder in meer detail die algemene situasie rondom mediese dienste in Orania bespreek, wil ons net eerstens u stelling dat mediese helikopters nie meer in Orania mag land nie aanspreek. Dit is absoluut onwaar en geen verandering het in die beskikbaarheid daarvan plaasgevind nie. Hierdie is eintlik ñ goeie voorbeeld van onwaar gerugte wat vir een of ander rede versprei word en die belangrikheid daarvan dat mense sulke dinge moet bevestig voordat hulle dit glo en verder versprei.

Wanneer die mediese dienste in Orania beoordeel word, moet dit in gedagte gehou word dat dit, soos alle ander sektore van ons ekonomie, op 'n vryemark basis funksioneer. Met ander woorde, behalwe vir die verskaffing van infrastruktuur (paaie, water, kragnetwerk ens) wat 'n omgewing skep waarin enige besigheid kan werk, raak die Dorpsraad dus nie betrokke by die besigheids-aktiwiteite self nie (behalwe vir die registrasie daarvan en die sonering van besigheidsgebiede ens). Hierdie benadering, wat van die begin van Orania af gevolg is, het beteken dat daar geleidelik oor die jare, soos die populasie gegroei het, meer en meer verskillende soorte besighede oopgemaak het, soos dit vir hulle ekonomies lewensvatbaar geword het om so te maak. Dieselfde het ook met mediese dienste gebeur, waar daar aanvanklik eintlik geen plaaslike medici was nie, deur tye toe dit later elke nou-en-dan beskikbaar was, tot waar daar vandag voltydse dokters (en meer) op die dorp is. Behalwe vir die privaat dokters, bied die kliniek natuurlik ook deurgaans mediese dienste, al is daar ongelukkig nie elke dag dokters nie.

Die onlangse vermindering in Oramed se na-uurse dienste is iets wat ongelukkig ook maar deur ekonomiese omstandighede veroorsaak word. Sekere van hulle personeel het aanbeweeg na ander plekke toe (maar daar is ook weer nuwe paramedici wat by hulle aangesluit het). Hulle is 'n privaat praktyk en doen die beste wat hulle kan in 'n klein dorpie soos Orania en ons is baie dankbaar vir die uitstekende sorg wat hulle aan almal bied.

Soos Orania verder groei sal mediese dienste sekerlik verder uitbrei en ons almal droom van 'n tyd wanneer ons groot genoeg is om hospitale te hê waar allerhande gespesialiseerde dienste beskikbaar is en groot operasies gedoen kan word ens