Ons sien u goeie bedoelings daarin om te noem dat dit "lekker is om te sien huis pryse kom af in Orania", want ons neem aan u wil ook hê dat dit moontlik moet wees vir "gewone" mense om eiendom in ons dorp te kan bekostig. Ons is egter nie seker of u aanname dat dit die geval is noodwendig korrek is nie, want daar is geen amptelike statistiek wat dit aandui nie. Toegegee, mens kan seker die eiendomsagente se advertensies dophou om 'n idee van pryse te kry, maar dit sal nooit presies akkuraat kan wees nie, so die enigste syfers wat definitief vertrou kan word is wanneer verkoop-pryse vir aandeelblokke jaarliks in die sensus gepubliseer word. Die nuutste sensus (wat laas maand uitgekom het) het gewys dat die gemiddelde prys van alle aandeelblokke wat in 2024 verhandel is ('n totaal van amper 130) marginaal gegroei het teenoor die vorige jaar.

Wat u vraag oor inwoner getalle betref, kan ons noem dat die volgende telling van inwoners oor twee maande gedoen gaan word (dit gebeur elke jaar in Desember) en dat die uitslag daarvan vroeg in volgende jaar gepubliseer sal word. Die nuutste getalle wat beskikbaar is, is dus steeds die telling van Desember 2024, toe daar 3025 mense in Orania was (ongeveer 5,3% meer as die vorige jaar).