Die bekostigbaarheid daarvan vir nuwe inwoners om Orania toe te trek, asook vir bestaande inwoners om 'n gemaklike bestaan te kan voer, is iets waaroor baie gedink word. Ons stem saam met jou dat dit eintlik so maklik as moontlik moet wees vir Afrikaners wat ons ideale en waardes deel om hierheen te kan kom, sonder dat geld dit in baie gevalle amper onmoontlik moet maak.

Die vryemark waarna jy verwys (wat op hierdie stadium veroorsaak dat huispryse in Orania relatief hoog is maar huur relatief laag) is egter iets wat Orania se "owerheid" uiters versigtig is om mee te peuter. Prysbeheer is al herhaaldelik en oorweldigend bewys om nie 'n goeie volhoubare stelsel vir enige ekonomie te wees nie, net soos die sosialistiese beskikbaarstelling van dienste - waarvoor enige gesonde gemeenskap se burgers en instellings (kerke ens) eintlik self verantwoordelikheid moet neem - ook nie is nie. Dit is dus uiters onwaarskynlik dat Orania se bestuur op enige direkte manier by die pryse van eiendomme sal inmeng, behalwe deur die feit dat nuwe ontwikkelings (ook deur privaat ontwikkelaars) aangemoedig word sodat die aanbod teenoor vraag verhouding van nature die pryse bietjie in toom behoort te hou.

Gelukkig is daar ook ander dinge in Orania wat alreeds meer bekostigbaar is as in Suid Afrika, wat die lewe vir ons mense op sekere gebiede makliker maak. Orania se kruideniersware is byvoorbeeld bewys om goedkoper te wees as in Suid Afrika (sien die opnames wat in die sensus gepubliseer word), en Orania Gesondheidsorg MSW maak dit moontlik vir inwoners om teen uiters goeie pryse toegang tot dokters te kry.