Goeiedag Henk,

Ons is jammer om te hoor dat jy voel jy is ingedoen, maar eintlik is jou boodskap ’n perfekte voorbeeld van wat gebeur wanneer mense nie volledig ingelig is oor dinge nie, so ons gaan gou bietjie agtergrond gee om te verduidelik.

Let asb op die volgende :

1. Onthou dat Orania Ontwikkelings Maatskappy (OOM) ’n besigheid is wat niks te doene het met Orania se amptelike leierskap of bestuur nie. Hulle is dus ontwikkelaars wat heeltemal onafhanklik staan van die Orania Verteenwoordigende Raad (OVR) en die Dorpsraad ens.
2. In ons ervaring handhaaf OOM baie goeie administrasie, so as jy die nodige papierwerk by hulle indien is ons seker dit sal korrek hanteer word.
3. Indien jy nogsteeds nie tevrede is nie, kan jy van Orania se amptelike prosesse om geskille tussen inwoners op te los gebruik maak, deur ’n proses van mediasie/rondetafel-gesprek by Regspleging te gaan oopmaak. Al die partye kry dan kans om hulle onderskeie sake te stel en onder leiding van die opgeleide mediator hopelik by ’n onderlinge ooreenkoms uit te kom.
4. Die Orania-manier is dus om van amptelike interne strukture en prosesse gebruik te maak en beslis nie om sommer na die media of buite instansies toe te gaan nie (en veral nie wanneer daar boonop ooglopende misverstande is oor die strukture en watter instansies betrokke is nie ens, want dit kan seker selfs lei tot regsaksie teen iemand wat onakkurate beskuldigings in die openbaar lug wat dan naamskending/laster kan wees). Orania se inwoners behoort dus eers interne opsies deur te loop voordat eksterne kanale gebruik word indien nodig.

Jy is welkom om ’n afspraak by die Dorpskantoor te maak of om ’n e-pos te stuur na inligting@myorania.co.za as jy hierdie gesprek privaat wil voortsit.