Ons stem saam dat Orania moet streef na ’n gemeenskap van gesonde families waarin kinders opgevoed kan word in Christelike waardes wat deur pa’s en ma’s aan hulle oorgedra word — nie net deur woorde nie, maar ook deur dade en die praktiese uitleef van daardie beginsels in hulle eie lewens. Gelukkig is dit reeds in die grootste meerderheid van gevalle in Orania die geval, maar natuurlik is alle gemeenskappe (net soos alle persone) nie perfek nie en moet daar deurgaans gemik word om te verbeter.

Dit is dan ook waarom dit so belangrik is dat Oraniërs betrokke bly by hulle gemeentes, want dit is waar daardie dinge die beste vasgelê word en waar diegene wat afdwaal, in liefde teruggelei kan word na Jesus toe (almal is tog sondaars).