Opdatering op 16 September 2025 - Die motorisering van die skuifhekke is afgehandel en dit sal voortaan vir mense moontlik wees om deur die hekke te beweeg na-ure sonder om dit per hand te doen. Dit maak ook die dorp se veiligheid beter, want die hekke kan nou vanuit die beheerkamer beheer word en sal nie meer oopgelos word deur onbedagsame bestuurders in die middel van die nag nie.

Opdatering op 4 Augustus 2025 - Die "slordige" draadheinings is intussen reeds netjieser gemaak. Inwoners sal relatief binnekort opmerk dat die twee hekke aan weerskante van die R369 by die hoof-kruising gemotoriseer word, sodat beter toegangsbeheer oornag toegepas kan word vanuit die beheerkamer.

29 Julie 2025 - Dankie daarvoor dat die netheid van Orania vir jou belangrik is. As almal in ons gemeenskap erns neem daarmee om 'n mooi en fraaie omgewing te skep, sal ons dorp selfs nog beter vertoon as tans.

Ons stem saam dat die afronding rondom die nuwe hekke nie mooi is op hierdie stadium nie en dit sal binnekort verbeter word.

Die rede daarvoor is dat daar eintlik beplan was om mure aan weerskante van die hekke te bou, so die drade was net tydelik so gelos totdat daardie bouwerk gedoen kon word. Intussen is daar egter besluit om eerste die twee hekke by die hoof-kruising te motoriseer sodat toegang beter beheer kan word oornag, so die bou van die mure gaan nie binnekort gebeur nie en daarom sal die heinings nou netjieser gemaak word.