Die kort antwoord is dat dit maar 'n kwessie van finansies is. Dis ongelooflik duur om die gemeenskapswembad te bedryf.

Net die koste verbonde aan die elektrisiteit om die swembadpomp te dryf, beloop meer as Φ1000 per dag.  Dan moet die kostes vir chemikalieë, mannekrag en dies meer wat ook meer as Φ1000 per dag beloop, nog bygetel word.

Statistiek wys ook dat ons tradisioneel 'n dramatiese afname het in besoekers tydens Maart (vergeleke met Februarie). Swembadbesoeke bereik gewoonlik sy maksimum gedurende Desember met Januarie beduidend laer, Februarie ongeveer nog 50% laer as Januarie en dan teen Maart is daar weer slegs die helfte van Februarie se besoekers. In werklikheid bedryf ons die swembad reeds teen Maart op 'n beduidende verlies as gevolg van die baie lae besoekersgetalle. Daar was in die laaste weke dae waarop die lewensredders al die oop ure van die swembad op diens was, maar dan kom daar net 6 besoekers – wat natuurlik op geen manier finansiële sin maak nie.

Ons het egter hierdie jaar 'n bespreking van die terrein gekry vir komende Sondag die 5de April waar die organiseerders van Bokkieweek die terrein gereserveer het (teen 'n fooi). Ons aanvanklike plan was om die swembad aan die einde van Maart te sluit (vir die redes soos hierbo verduidelik) maar met die Bokkieweek die komende naweek, het ons besluit dat dit sin maak om die swembad nog 'n week langer oop te hou.

Ons sou graag wou sien dat die swembad langer sou oop wees en dis eintlik onverklaarbaar dat mense so vroeg in die seisoen reeds ophou swem, maar ongelukkig is dit die werklikheid op die grond.