MALARIA IN ORANIA-OMGEWING

184/2025

2 Oktober 2025

Geagte Oraniërs,

MALARIA IN ORANIA-OMGEWING

Opsomming : Daar het onlangs bevestigde gevalle van malaria in die Orania-omgewing voorgekom, so as mense sulke simptome ervaar, moet dit ernstig hanteer word.

Hoewel Orania nie ’n gebied is waar malaria natuurlik voorkom nie, is daar onlangs wel gevalle in byvoorbeeld Luckhoff aangemeld. Dit is waarskynlik dat besmette muskiete in bv vragmotors saamgereis en daarna plaaslike inwoners gebyt en geïnfekteer het. Malaria kan in sommige gevalle lewensgevaarlik wees en hierdie situasie moet dus met die nodige sorg hanteer word.

Dit is belangrik dat persone wat malaria-simptome ervaar, dit ernstig opneem en so gou moontlik met ’n geneesheer of ander kundige mediese praktisyn daaroor raadpleeg. Van die algemeenste eerste simptome van malaria is baie soortgelyk aan dié van verkoue of griep en sluit die volgende in:
* Koors (wat in golwe kan kom en gaan)
* Koue rillings en sweet
* Hoofpyn
* Spier- en gewrigspyn
* Moegheid en swakheid
* Naarheid en braking of diarree

Ons moedig dus alle inwoners aan om die moontlikheid van malaria in gedagte te hou wanneer iemand siek word, selfs al lyk die simptome aanvanklik nie ernstig nie.

Vriendelike groete,

Ettiene de Lange
Hoof – OVD

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/