ORANIA SE JAARLIKSE BESIGHEIDSOPNAME BEGIN MAANDAG

028/2026

13 Maart 2026

Geagte Oraniërs,

ORANIA SE JAARLIKSE BESIGHEIDSOPNAME BEGIN MAANDAG

Opsomming : Die besigheidsopname word hierdie jaar tussen 16 en 31 Maart 2026 gedoen, dus kan besigheidseienaars verwag om vanaf Maandag daaroor gekontak te word.

Dit is vir Orania van groot waarde om oor die beste moontlike data rakende die stand van ons ekonomie en die veranderinge daarin te beskik, sodat besigheidseienaars en die dorpsbestuur ingeligte besluite kan neem. Deur sekere tendense te identifiseer, kan die sukses van vorige besluite geëvalueer word en die beste opsies vir die toekoms oorweeg word.

Die jaarlikse besigheidsopname is die doeltreffendste manier om hierdie belangrike data te bekom, en almal se samewerking word dus opreg waardeer.

Let asseblief op die volgende belangrike punte:
* Die opname is anoniem. Daar word slegs gekontroleer óf ’n spesifieke besigheid dit ingevul het, nie wát ingevul is nie.
* Besigheidseienaars sal vanaf eerskomende Maandag op verskillende maniere daaroor gekontak word, wat e-posse, WhatsApp-boodskappe, telefoonoproepe en fisiese besoeke kan insluit.
* Daar sal hierdie jaar vir die eerste keer skakels wees waardeur die opname elektronies voltooi kan word – wat sterk aanbeveel word.
* Indien iemand dit verkies, kan ’n sogenaamde “Smart PDF” ook verskaf word om dit op ’n ander elektronies metode te voltooi.
* Indien iemand dit in harde kopie wil voltooi, sal die opnamevorm by hulle afgelewer en later weer opgetel word (in ’n blanko koevert, om anonimiteit te verseker).
* Die Orania Sakekamer is weer, saam met die Dorpsraad, by hierdie opname betrokke en help om onder andere die korrekte anonieme hantering en verwerking van die data te verseker.
* Die vrae in die opname bly grotendeels onveranderd van vorige jare, maar daar is wel ’n aanpassing in kategorieë gemaak om vir inflasie voorsiening te maak.

Soos altyd sal die uitslae van hierdie opname later vanjaar as deel van die amptelike sensus gepubliseer word.

Enige vrae hieroor kan aan die Dorpsraad gerig word deur van die skakels onder aan hierdie boodskap gebruik te maak.

Vriendelike groete,

Cobus Pretorius
Hoof : Beplanning en Grondgebruik

U kan, soos altyd, die Dorpsraad oor enige onderwerp kontak deur die volgende skakel te volg : https://myorania.co.za/kontak-ons/
Indien u dit anoniem wil doen, kan u die Anonieme Forum op die myorania.co.za webwerf gebruik, deur die volgende skakel te volg – https://myorania.co.za/anonieme-voorstelle-opmerkings-of-klagtes/