OVR KENNISGEWING : ONTMOETING MET NOORD-KAAPSE EFF IN KIMBERLEY

074/2025

10 April 2025

Geagte Aandeelhouers en Inwoners,

OVR KENNISGEWING : ONTMOETING MET NOORD-KAAPSE EFF IN KIMBERLEY

Nota : Hierdie kennisgewing van die Orania Verteenwoordigende Raad (OVR) word deur die Dorpsraad se kanale versprei om soveel as moontlik Oraniërs te bereik.

OPSOMMING : ‘n Afvaardiging van Orania vergader môre, 11 April 2025, met die leierskap van die Noord-Kaapse EFF in Kimberley.

‘n Uitgebreide OVR-OAB afvaardiging ontmoet môre (Vr 11/04) bestuurslede van die Noord-Kaapse EFF in Kimberley. Daar is aanvanklik oorweeg om hulle in Orania te ontvang, maar later is besluit om hulle in Kimberley te ontmoet. Die doel van die ontmoeting is om moontlike misverstand oor Orania se status en strewe op te klaar en dalk selfs verdere aksies teen Orania te beperk.

Die EFF se beleid is strydig met wat ons in Orania doen en glo, maar net soos hulle deel van die Suid-Afrikaanse en Noord-Kaapse werklikheid is, is Orania dit ook. Daarom is ‘n ontmoeting eerder as ‘n konfrontasie verkieslik en sal ons poog om die waardigheid en wettigheid van ons strewe by hulle tuis te bring.

‘n Lewensvatbare verhouding berus op erkenning en respek. Ons is bereid om erkenning te gee, maar kan dit net doen solank ons ook erkenning ontvang. Daarom kan ons nie aanvaar dat hulle “Orania moet val” veldtog waardig of wettig is nie. Belangriker nog is die feit dat Orania in werklikheid reeds anderkant die politiek is wat hulle beoefen en dat ons benadering van eie arbeid, eie grond en eie instellings meer post-koloniaal as hulle benadering van radikale ekonomiese transformasie is.

Hoewel die twee groepe wat mekaar môre ontmoet weerskante van ‘n diep politieke afgrond staan, het ons al gesien dat mense-in-gesprek groot verskille kan oorbrug. Terwyl sulke gesprek verskille nie tot niet maak nie, kan dit tog tot ‘n beter verstandhouding en minder vyandigheid lei – iets wat Orania tot groot voordeel kan strek.

In Orania is ons bouers eerder as brekers. As dit dan van ons die ekstra myl vereis (letterlik Kimberley toe), loop ons dit graag ter wille van ons gemeenskap, al is sukses nie gewaarborg nie. Ons spreek ook ons dank uit aan die Noord-Kaapse VF Plus wat die ontmoeting aanlê en reeds voorbrand vir Orania se saak gemaak het.

Vriendelike groete,

Carel Boshoff
OVR Ondervoorsitter

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/

Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/