OVR TUSSENVERKIESING OM VAKANTE POSTE TE VUL

142/2025

1 Augustus 2025

Geagte Oraniërs,

OVR TUSSENVERKIESING OM VAKANTE POSTE TE VUL

Opsomming : Wat die opkomende OVR tussenverkiesing betref, vind registrasies om te kan stem, asook nominasies van kandidate, volgende week plaas. Die verkiesing self gebeur op 28 Augustus 2025.

Die Orania Verkiesingskomitee (OVK) wil hiermee graag die gemeenskap inlig dat daar op Donderdag, 28 Augustus 2025, ’n tussenverkiesing sal plaasvind. Hierdie verkiesing het ten doel om twee vakante poste in die Orania Verteenwoordigende Raad (OVR) te vul.

Belangrike inligting
* Alle persone met verblyfreg in Orania is geregtig om te stem.
* Registrasies en nominasies van kandidate begin op Maandag, 4 Augustus 2025, en sluit op Vrydag, 8 Augustus 2025 om 15:30.
* Registrasies en nominasies kan gedoen word by die Orania Poskantoor.
* Gemeenskapslede word aangemoedig om ook by die poskantoor te bevestig of hul name op die bestaande kieserslys verskyn en om enige gewysigde besonderhede op te dateer.
* Aanlyn registrasies en nominasies is ook moontlik deur ’n e-pos te stuur aan oraniaverkiesingskomitee@gmail.com.

Let daarop dat registrasies en nominasies stiptelik op Vrydag, 8 Augustus om 15:30 sluit. Geen laat inskrywings sal aanvaar word nie.

Ons doen ’n beroep op elke lid van die gemeenskap om betrokke te raak by hierdie belangrike proses en om aktief deel te neem aan die verkiesing. Saam bou ons aan ’n sterk en verteenwoordigende OVR.

Met waardering,

Orania Verkiesingskomitee
2025