SENSUSOPNAME VIND OOR DIE VOLGENDE TWEE WEKE PLAAS

221/2025

28 November 2025

Geagte Oraniërs,

SENSUSOPNAME VIND OOR DIE VOLGENDE TWEE WEKE PLAAS

Opsomming : Orania se jaarlikse sensus vir 2025 vind vanaf Maandag 1 Desember tot Vrydag 12 Desember plaas.

Inligting oor die hoeveelheid persone in die groter Orania sal oor die volgende twee weke op een of meer van die volgende maniere vanaf inwoners verkry word:
* ’n verteenwoordiger van die Dorpsraad kan u in persoon kontak;
* ’n e-pos kan gestuur word;
* ‘n hardekopie-vorm kan beskikbaar gemaak word;
* telefoonoproepe aan inwoners kan gemaak word; en
* inligting kan ingesamel word vanaf skole, besighede, instellings en die bestuur van die ander grondentiteite (Kambro, 272 en VKN).

Inwoners hoef glad nie bekommerd te wees as hulle op meer as een van hierdie maniere getel word nie, want daar is ’n proses in plek om dupliserings uit te skakel. Trouens, dupliserings help eintlik om as kruisverifiëring vir die korrektheid van die ingesamelde data te dien.

Die sensus is van groot waarde vir die doeltreffende bestuur van Orania en vir akkurate beplanning vir die toekoms. Inwoners word dus aangemoedig om volledig saam te werk en om antwoorde te verskaf wat so akkuraat as moontlik is. Ons pas die voorskrifte van die POPIA-wetgewing streng toe en alle inligting sal vertroulik hanteer word.

Inligting wat versamel gaan word, is die volgende:
* Aandeelblok/adres (bv. A123, K123, VKN Dorp/Oewer 123, Plaas 272 Nooitgedacht Huis 123)
* Aantal huishoudings op die aandeelblok (ook huurders)
* Aantal volwassenes
* Aantal kinders
* Aantal geboortes

Indien daar spesifieke vrae oor die sensusopname is, kan Jennifer Loots by die Dorpskantoor gekontak word (053 207 0063), of kan die skakels aan die onderkant van hierdie boodskap gebruik word.

Vriendelike groete,

Cobus Pretorius
Hoof : Beplanning en Grondgebruik

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes