WEES VERSIGTIG VIR VALS WHATSAPP BOODSKAPPE IN ONS GEMEENSKAP

Geagte Aandeelhouers en Inwoners,

WEES VERSIGTIG VIR VALS WHATSAPP BOODSKAPPE IN ONS GEMEENSKAP

Opsomming : Daar was oor die laaste paar dae vele gevalle van Oraniërs wat vals WhatsApp boodskappe vanaf ander Oraniërs ontvang het, waarin vir geld gevra word. Verifieër dus ALTYD telefonies voordat enige geld oorbetaal word.

Almal moet asseblief bedag wees daarop om nie uitgevang te word deur ‘n WhatsApp slenter wat hierdie week na vore gekom het nie. ‘n Hele paar gevalle het bekend geword waar lede van Orania WhatsApp groepe se nommers blykbaar onderskep is en deur skelms gebruik word om geld by ander mense te probeer kry. Hierdie versoeke is bedrog en word gemaak sonder dat die regte eienaar van die nommer daarvan bewus is.

Wat moet mense doen wanneer hulle ‘n verdagte boodskap ontvang :

1. Moet geen geld oorbetaal nie!

2. Verifieër telefonies of persoonlik met die persoon wat die boodskap gestuur het, sodat hulle ook bewus is daarvan dat hulle nommer deur skelms gebruik word.

3. Indien die onderskepte nommer ‘n Vodacom nommer is (wat blykbaar meestal waar is), moet dit dadelik by Francis by die Vodacom winkel aangemeld word, sodat sy die geval op hulle stelsels kan rapporteer en die nodige stappe geneem kan word.

4. As iemand se nommer reeds onderskep is, kan hulle in hul WhatsApp instellings kyk vir Gekoppelde Toestelle (“Linked Devices”) en alles verwyder wat nie daar hoort nie, wat moontlik die probleem sal oplos.

5. Mense kan hulself beskerm teen hierdie bedrog deur by hulle sekuriteit-instellings op WhatsApp ‘n e-pos adres (en dalk selfs ‘n PIN ook) op te stel, wat dit byna onmoontlik sal maak vir skelms om die nommer te onderskep.

U is, soos altyd, welkom om in kontak met die dorpsraad te tree oor enige onderwerp, deur van die volgende skakel gebruik te maak:

$ https://myorania.co.za/kontak-ons/$ 

Vriendelike groete,

Ettiene de Lange

Hoof : Orania Veiligheidsdienste (OVD)