LANDSWYE PROTESAKSIE IN SUID-AFRIKA EERSKOMENDE DINSDAG (30 JUNIE 2026)

081/2026

26 Junie 2026

Geagte Oraniërs,

LANDSWYE PROTESAKSIE IN SUID-AFRIKA EERSKOMENDE DINSDAG (30 JUNIE 2026)

Opsomming : Geen gevaar word vir Orania voorsien met Dinsdag se landswye protesoptrede teen onwettige buitelanders in Suid-Afrika nie, maar ons veiligheidspanne is tog goed voorbereid op moontlike gebeurlikhede.

Baie Oraniërs sal bewus wees daarvan dat daar eerskomende Dinsdag wydverspreide protesoptredes en betogings regoor Suid-Afrika verwag word (maar nie juis veel in die Noord-Kaap nie). Die “teiken” van hierdie aksies is grotendeels onwettige immigrante in die land, maar daar is ook opstokers wat mense probeer opsweep om meer as net dit te doen.

Hierdie situasie word reeds vir ‘n geruime tyd deur Orania Veiligheidsdienste (OVD) en die Orania Weerbaarheidsvereniging (OWV) dopgehou om seker te maak dat ons voorbereid is op enige gevaar wat moontlik in ons rigting mag kom. Die risiko-analise van die situasie toon egter op hierdie stadium dat dit hoogs onwaarskynlik is dat ons enige direkte gevaar loop. ‘n Wye verskeidenheid nuuskanale word in die analise gebruik, asook direkte skakeling met omliggende wetstoepassers, en alles dui daarop dat daar geen probleme in ons gebied behoort voor te kom nie.

Ons veiligheidstrukture is egter, soos altyd, in elk geval voorbereid op enige gebeurlikhede. Die beheerkamer is natuurlik 24 uur per dag operasioneel, en daar is goed ontwikkelde gebeurlikheidsplanne in plek vir die hantering van talle verskillende moontlike risiko’s. Benewens OVD se voltydse beamptes, is daar ook verskeie vrywilligerspanne in die OWV – met die nodige opleiding en toerusting – wat op bystand is om onmiddellik op enige moontlike gevare te reageer.

Daar is dus geen rede vir inwoners om hulle oormatig hieroor te bekommer nie, en ons kan almal, soos gewoonlik, in vertroue op Jesus se leiding en beskerming sorg dat ons paraat bly en saamwerk om ‘n veilige gemeenskap te verseker. Indien daar enigiets voorkom wat inwoners voel aangemeld moet word, kan dit gedoen word deur die beheerkamer te kontak by 053 207 0089 of 060 501 7877.

Orania groete,

Gesamentlike Operasionele Sentrum (GOS)

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/