Belegging in Orania

voorstelle

Belegging in Orania

Opmerking/Vraag - Goeie dag, en baie dankie vir alles wat julle vir ons mense doen!

Ek glo opreg dat dit tyd is vir Orania om ’n “one-stop shop” vir beleggings te skep. Op die oomblik is alles te deurmekaar en gefragmenteerd. Daar is die Stadsboufonds, Orasol en OOM, maar min mense verstaan regtig hoe dit werk of hoe om daarin te belê.

Daar behoort ’n toep (app) of ’n sentrale kantoor te wees waar al hierdie inligting duidelik en eenvoudig beskikbaar is. As dit op ’n toeganklike en gebruikersvriendelike manier aangebied word, sal mense baie makliker betrokke raak.

Ek sê dit met oortuiging: as so ’n platform beskikbaar is, sal julle binne ses maande sien hoe Afrikaners miljoene rande belê.

Vriendelike groete

Nota - Volgens nuwe protokol word opmerking/vrae soms deur admin geredigeer om gepas te wees vir hierdie webwerf en om slegs die essensie daarvan weer te gee.

Terugvoering

Baie dankie vir die positiewe terugvoer en ook vir hierdie voorstel.

Ek dink daar is beslis meriete in wat jy sê. Daar bestaan reeds verskeie maniere waarop mense in Orania kan belê of tot ontwikkeling kan bydra, maar omdat dit deur verskillende instellings bestuur word en elkeen 'n ander doel het, is dit nie altyd maklik vir iemand van buite om die verskillende opsies te verstaan of te weet waar om te begin nie.

Daar is byvoorbeeld ontwikkelingsfondse, eiendomsgeleenthede, besigheidsbeleggings en ander finansieringsmeganismes wat elkeen 'n spesifieke rol in Orania se ontwikkeling vervul. Dit beteken ongelukkig ook dat die inligting tans oor verskillende platforms versprei is.

Jou voorstel van 'n meer sentrale, gebruikersvriendelike toegangspunt – hetsy 'n webblad, toep of ander "one-stop shop" – is dus 'n geldige en interessante gedagte. Selfs al bly die verskillende instellings onafhanklik van mekaar funksioneer, kan dit beslis help as mense op een plek 'n eenvoudige oorsig kry van die verskillende moontlikhede en dan maklik na die toepaslike organisasie verwys word.

Dankie dat jy die tyd geneem het om hierdie idee met ons te deel. Ons waardeer dit en sal dit beslis saam met die betrokke rolspelers onder die aandag bring.