INTERVLAK-GEVALLE

opmerkings

Opmerking/vraag: ’n Skrywe is aan die Dorpsraad gerig in reaksie op die OVR se kennisgewing oor die praktiese hantering van sogenaamde “Intervlak”-aktiwiteite (sien OAB Kennisgewing 133/2026 - PROSES VIR DIE HANTERING VAN “INTERVLAK”-GEVALLE – My Orania). Die intervlakprosedure verduidelik hoe Orania se grondbeginsels van Eie Grond, Eie Arbeid en Eie Instellings beskerm word, terwyl alle Oraniërs onvermydelik op vele maniere met die wêreld buite Orania in wisselwerking tree. Die skrywe was hoofsaaklik ’n emosionele tirade sonder enige inhoudelike substansie.

Nota - Volgens nuwe protokol word opmerking/vrae soms deur admin geredigeer om gepas te wees vir hierdie webwerf en om slegs die essensie daarvan weer te gee.

Terugvoering

In reaksie op die skrywe, die volgende:

Ons bedank die skrywer daarvoor dat hy/sy Orania se grondbeginsels net so belangrik ag as wat die “owerheid” dit ag. Hy/sy kan gerus ook die onlangs aanvaarde Grondwet (’n ander dokument wat deur die huidige OVR opgestel is) lees om herinner te word aan die pragtige grondslag waaruit ons strewes en beleide gebore word. Die Grondwet kan afgelaai word deur die volgende skakel te volg: Dokumente - OVR
Aangesien die skrywer geen substantiewe punte gemaak het nie, kan ons nie eintlik daarop reageer nie.
Ons wil die skrywer net weer daaraan herinner dat die Dorpsraad natuurlik nie namens die OVR kan praat nie. Indien hy/sy dus graag met die OVR self wil gesels oor hulle aktiwiteite, kan dit onder andere gedoen word deur ’n e-pos aan admin@ovr.co.za te stuur (en natuurlik is dit ook maklik om met enige lid van die OVR privaat afsprake vir in-persoon gesprekke te maak, want hulle lede is almal deel van ons gemeenskap met wie enigeen maklik kan praat).