SLENTER RONDOM SELFOON-LUGTYD IS WEER AKTIEF

200/2025

28 Oktober 2025

Geagte Oraniërs,

SLENTER RONDOM SELFOON-LUGTYD IS WEER AKTIEF

Opsomming : Alle inwoners moet asseblief bedag wees daarop dat bedrieërs weer aktief is in Orania met ’n slenter rondom selfoon-lugtyd.

’n Skelmstreek wat al vantevore in Orania voorgekom het, het ongelukkig weer sy kop uitgesteek. Orania Veiligheidsdienste (OVD) probeer altyd die gemeenskap op alle vlakke teen misdaad beskerm – nie net fisies nie – so hiermee wil ons inwoners graag hierteen waarsku.

Oor die afgelope week is verskeie prominente besighede en persone bedrieg deurdat hulle selfoon-lugtyd aan iemand verskaf het, maar nooit betaling daarvoor ontvang het nie. Hierdie skelmstreek gaan gewoonlik gepaard met beloftes van ander transaksies of vals bestellings wat geplaas word. Dit laat die versoek vir lugtydkodes dikwels minder verdag lyk en lei uiteindelik tot ’n suksesvolle diefstal.

Die beste manier vir Oraniërs om hulle teen hierdie gevaar te beskerm, is om nooit kodes vir selfoon-lugtyd aan enigiemand te verskaf sonder onmiddellike betaling nie.

Vriendelike groete,

Ettiene de Lange
Hoof – OVD

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/