TERUGVOER AAN GEMEENSKAP NA AFLOOP VAN ONLANGSE VEILIGHEIDSGESPREK

Geagte Aandeelhouers en Inwoners,

TERUGVOER AAN GEMEENSKAP NA AFLOOP VAN ONLANGSE VEILIGHEIDSGESPREK

Opsomming : Tydens ‘n onlangse gesprek met die gemeenskap het die hoof van OVD die veiligheidswaardering vir Orania, asook die raamwerk waarbinne die veiligheidsplan opgedateer is, bespreek. Daar is ook ‘n beroep gedoen op die gemeenskap om as vrywilligers by die dorp se veiligheidsstrukture betrokke te raak.

Ons wil hiermee graag opsommende terugvoer gee oor die gespreksgeleentheid wat op 31 Oktober 2024 tussen Orania Veiligheidsdienste (OVD) en die gemeenskap plaasgevind het. Tydens daardie gesprek is die nuwe veiligheidswaardering vir die gebied waarin die dorp Orania val, asook die gevolglike ontwikkeling van ‘n opgedateerde veiligheidsplan, bespreek. Die veiligheidswaardering en gepaardgaande veiligheidsplanne bepaal hoe OVD se hulpbronne aangewend word.

Die mees waarskynlike tipes veiligheidsinsidente wat in die veiligheidswaardering geïdentifiseer is, in oorleg met gepaste instansies en die SAPD, is ;

(1) plaasaanvalle/plaasmoorde,

(2) wegholbrande in die omgewing en selfs in die dorp en

(3) georganiseerde misdaad.

Hoewel Orania se veiligheidsplan ‘n wye verskeidenheid moontlike bedreigings dek, word daar veral op hierdie mees waarskynlike risiko’s gefokus.

Die veiligheidsoefening wat op 26 Oktober plaasgevind het, het byvoorbeeld amper al hierdie punte gedek deur ‘n fiktiewe bende-aanval in die dorp te simuleer, wat ook brandstigting ingesluit het. In ooreenstemming met die veiligheidsplan is daar onmiddellik ‘n Gesamentlike Operasionele Sentrum (GOS) gestig om die reaksie op die insident te koördineer. Die nagebootste situasie is effektief en spoedig hanteer. Soos altyd, in die gees van aanhoudende verbetering, is daar ook sekere aanpassings vir die toekoms geïdentifiseer en reeds geïmplementeer.

Tydens die gesprek het Ettiene de Lange ook benadruk dat OVD graag saam met die gemeenskap werk, aangesien dit die beste manier is om ‘n veiligheid vir almal te verseker en dit is veral belangrik in Orania, met sy unieke aard waar mense selfwerksaam is en verantwoordelikheid neem vir hul eie omstandighede. Vrywilligers word dus sterk aangemoedig om OVD te kontak en by die veiligheidstrukture betrokke te raak, in rolle wat nie noodwendig enige spesifieke fisiese vermoëns vereis nie.

U is, soos altyd, welkom om hierdie aangeleentheid (of enige ander kwessie) met die Dorpsraad te bespreek deur die volgende skakel te volg:

$ https://myorania.co.za/kontak-ons/$ 

Vriendelike groete,

Ettiene De Lange

Hoof : OVD