VERBLYFREG OPGEHEF (MERIESA BECK)

072/2025

8 April 2025

Geagte Aandeelhouers en Inwoners,

VERBLYFREG OPGEHEF (MERIESA BECK)

Opsomming : Meriesa Beck se verblyfreg is opgehef en inwoners moet in ag neem dat sy dus nie by regte is om in Orania te woon of te werk nie.

Die Orania Regspaneel het, na afloop van ʼn dissiplinêre verhoor, Meriesa Beck (ID:0303110074083) se Verblyfreg opgehef. Meriesa Beck het teen die vonnis na ’n Appèlpaneel geappelleer, maar haar aansoek was van die hand gewys en die vonnis (opheffing van Verblyfreg) gehandhaaf.

Voormelde volg op ’n klagte ingevolge Item 5 van Bylaag 1 van die Dissiplinêre Kode (soos van toepassing), naamlik ernstige aanranding of geweldpleging (aanranding met die doel om ernstig te beseer) en waaraan Meriesa Beck skuldig bevind is. Hierdie klagte volg nadat Meriesa Beck die slagoffer van haar aanranding op Orania se grondgebied ernstige steek/sny-wonde in haar gesig, nek en bors toegedien het. Dit is ook gemeensaak dat Meriesa Beck in ’n strafhof (te Hopetown) aan die klag van aanranding met die doel om ernstig te beseer skuldig bevind is.

Meriesa Beck moes derhalwe, ingevolge Orania se reëls, reeds Orania se grondgebied verlaat het, maar sy weier en/of versuim om aan sodanige beslissing gehoor te gee. Dít doen sy ten spyte van haar skriftelike onderneming in haar aansoek om Verblyfreg om wel Orania se reëls te respekteer en na te kom, insluitend die erkenning dat Verblyfreg opgehef kan word. Sy is derhalwe sonder die toestemming van die eienaar besig om Orania onregmatig te betree en/of te okkupeer.

Orania Aandeleblok (RF) (Edms.) Bpk., as die eienaar van die grondgebied waarop sy woon, gaan intussen voort met gepaste regstappe wat haar uitsetting insluit.

Inwoners word versoek om nie aan haar enigsins werk of verblyf te verskaf nie en ook nie om haar toe te laat om binne Orania besigheid te bedryf nie. Die gee van enige vorm van verblyf en/of werk aan Meriesa Beck of om haar toe te laat om besigheid te bedryf, is ’n oortreding van Orania se Verblyfregreëls en Dissiplinêre Kode.

Orania se gemeenskap word beskerm deur ons dissiplinêre prosesse wat ’n verhoor voor ’n onafhanklike paneel insluit. Ons is dankbaar vir die oorgrote meerderheid inwoners wat die belangrikheid hiervan insien en ook hul ondersteuning in die verband gee.

Dankie,

Orania Regspleging

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/

Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/