VAKANTE BETREKKING BY DORPSRAAD AS JUNIOR INFORMASIETEGNOLOGIETEGNIKUS (IT-TEGNIKUS)

132/2026

25 September 2026

Geagte Oraniërs,

VAKANTE BETREKKING BY DORPSRAAD AS JUNIOR INFORMASIETEGNOLOGIETEGNIKUS (IT-TEGNIKUS)

Opsomming : Orania Dorpsraad het ’n vakante pos vir ’n Junior Informasietegnologie-tegnikus (IT-tegnikus). Aansoeke sluit op Vrydag 9 Oktober 2026 om 16:30.

Oor die pos
Die Junior IT-tegnikus sal in diens wees van Orania Dorpsraad, ’n dinamiese instelling wat groei en daarna streef om op die voorpunt van dienslewering te wees.
Die Junior IT-tegnikus sal dienste aan al die filiaalmaatskappye van Orania Dorpsraad lewer en verantwoordelikheid neem vir onder meer die volgende:
* Die opstel, instandhouding en diens van gebruikerrekenaars, die opdatering van programmatuur en opleiding van gebruikers;
* Die installering en uitbreiding van kabelnetwerke;
* Die installering, instandhouding en uitbreiding van kabellose netwerke (WiFi);
* Die installering en instandhouding van moniteringskameras (kringkameras), die uitbreiding van kameranetwerke en ondersteuning aan die beheerkamer;
* Die instandhouding, optimalisering en uitbreiding van die VoIP-telefoonstelsel;
* Bedienerrugsteun, instandhouding van antivirusprogrammatuur en die algemene opdatering van programmatuur;
* Die instandhouding van netwerkdrukkers; en
* IT-verwante aankope.

Vereistes vir ’n suksesvolle aansoeker
Die ideale kandidaat vir bogenoemde pos moet oor die volgende beskik:
* ’n Sterk verbintenis tot die strewe van Orania en tot die beginsels van selfstandigheid, selfwerksaamheid en trotse Afrikanerskap soos dit in Orania beoefen word;
* ’n Toepaslike naskoolse kwalifikasie en twee jaar se vorige ondervinding in die inligtingstegnologieveld sal voordelig wees, maar is nie ’n vereiste nie;
* IT-tegnikussertifisering sal ’n sterk aanbeveling wees (bv. CompTIA A+ en N+);
* Die vermoë om onder druk te funksioneer en by doeldatums te hou;
* ’n Geldige bestuurderslisensie;
* Goeie administratiewe vaardighede;
* Die vermoë om goeie menseverhoudinge te handhaaf;
* ’n Sin vir deeglikheid en konsekwente optrede;
* Verblyfreg in Orania;
* Die vermoë om inligting vertroulik te hanteer; en
* Die vermoë om op hoogtes te werk.

Aansoekproses
Aansoeke moet voor of op Vrydag 9 Oktober 2026 om 16:30 by die Orania Dorpskantoor ingedien word, of per e-pos na theunie@myorania.co.za gestuur word. Slegs aansoeke in Afrikaans sal oorweeg word.

Skakel gerus vir Theunie Kruger by 053 207 0063 vir enige navrae.

Theunie Kruger
Hoof: Bedryfstelsels en Outomatisering

Inwoners kan, soos altyd, die Dorpsraad kontak deur die volgende skakel te gebruik: 🔗 https://myorania.co.za/kontak-ons/
Indien u dit anoniem wil doen, kan u ‘n opmerking plaas in die Anonieme Forum op ons webwerf: 🔗 https://myorania.co.za/anonieme-voorstelle-opmerkings-of-klagtes/